naglabasan ang mga iskolar ng bayan,
naghimutok sa sinapit ng minamahal na kampus:
mga baling sanga,
higanteng akasyang nakatingala sa langit ang mga ugat,
tuklap na bubong ng koop,
basag na salamin ng bulletin board sa registrar,
naghambalang na dahon ng royal palm tree,
umaalulong na ilog sa likod ng s.u.*
nagsalimbayan ang kislap ng kamera
at tikatik at tunog ng celfon –
agad ipinamalita ang tala ng pinsala
at ang mabuting balita na isang linggong
suspendido ang klase.
* s.u. – Student Union building